حنان
*****
أنا وانتى
قصايد شعر مكتوبه
على الأغصان
وطير من شوقه بيغنى
على الألحان
ونسمه ف السما طايره
بدون جناحات
ف كل مكان وأى زمان
أنا وانتى
عيون عاشقه تشوف النور
بيتمايل على الأزهار
ايدين مشتاقه تتقابل
ف كل نهار
بتتمنى
كفوفها الطاهره تتحنى
سلام وأمان
أنا وانتى
مراكب ف الغرام عايمه
بدون تصاريح
شراع من شوقه لعيونك
ماهمه الريح
بيرسم بالهوى صوره
لسنيوره
ف صوتها حنان
أنا وانتى
ف الغرام آيه
وقمراية تشق الليل
وكاس بالشهد متحلى
ماداقش الويل
مناه يلمس شفايفنا
ويسمعنا
نقول له كمان
أنا وانتى
الهرم والنيل
وناى عاشق يقول مواويل
وخيل بيسابق المراسيل
عشان يوصف لكل الناس
ملاك لابس هدوم إنسان
*****************
للشاعر / رضا أبو الغيط
ليست هناك تعليقات:
إرسال تعليق