(حصيلتي الهمس )
وكالعادة
بَضُم الحِلوَة والمُرَّة
واعيش باستني ينزلِي
مطر أخضر
عنيَّة وجعها مش شايفة
سوي الأصفر
يمينها بنات ف صحرا الخوف
وشوشهم
عليها الليل نسج خيطه
شمالهم
زلعة مكسورة بقالها زمان
مفيش مَيَّة ولا معروف
بَهِج بعيد
واسيب نفسي
وألم ضرسي بشُق الصدر
من جوِّه
سنين َللتوهة وخداني
ومنعاني
أكون بجناح بشوف الكون
بلون أبيض وضوء الشمس
حصيلتي الهمس
ومشكلتي عناد بِكبَر
لَكُون فارس يفوت م الجمر
لكون قشة ف مهب الريح
ما قَسَمِت ف يوم الضَّهر
وجُر معايا أوردتي
وشراييني
وضِيف ف الضِّيقة مين عدَّي
ومين خبَّط
على تِيني
وعودي حديد لذي القرنين
ليبني السد من لحمي
عشم إبليس من الجنة
أكون طينة ما فيش فيها
نور ربي
وتحت الجلد مِترَبِي
وحوش َواحناش
تضيق.. تُفرَج
مفيش أعرج
بيخلَي صدرُه من روحُه
وقلب بِحِس زي الناس
بتحكُم وانت مش عادل
وشايل كاس
هتتورَّط ف ظلم وريبة وحكاية
ماليها القحط والجبروت
لا نافع سطر يتحَبَّر
ولا كهنوت
مرايتي عشيقتي ودوارها
كدوامة بتبلعني
حَشيِت الضرس كم مرة
ويوجعني
وكالعادة بمِيل للعشق
والوادي
وَيطربني غنا الحادي
وما صبَّرني غير رِفقًا
يا انجَشتِي
بقوارِيرَك
تهِيج عِيرَك
وتتبسم
أروح وابصُم
بأنِّي
رغم ضيق صدري
هاشوف الشمس جايالنا
ولو حط الضباب
سَترُه
الشاعر وحيد راغب
ليست هناك تعليقات:
إرسال تعليق