ساعة أماسي
...............
باحب عرق الغيطان
سارح على خدود النخيل
باحب شوق السنابل
لميتك يا نيل
وباحب ريحة الفجر
طله م الادان تراتيل
ووش الصبح
اللى فارش للنهار
مواويل
وباحبك حبيبه
فرحه وطيبه
نسمه وضله
وشمس الأصيل
وفيونكه بتضحك
للون الضفاير
ونسمة بتنعس
في كف الستاير
ووردِك مزوّء
خد الجميل
باحبك تقاوي
لكل الغناوى
وشاي القهاوي
وشيشه يا غاوى
حلبه وجنزابيل
باحبك ف فرحك
وف عز جرحك
يا للى ملامحى
دايبه ف ملامحك
انتى يا سمره
بلحه وتمره
وسهره لثومه
مع نجمه وقمره
باحبك تماسي
لأهلى وناسى
وساعة أماسي
تداوي العليل
وصرخة شهيد
ف قلب الوليد
حالفه لبكره
تشفى الغليل
........................
للشاعر / سليمان خطاب
ليست هناك تعليقات:
إرسال تعليق