........ ع الخد سنابل ........
...................................
على اول خيط من ضي الفجر
جالي الوحي معاه أفكار
وكان جوايا حنين للشعر
ولفين بيغنوا على الاوتار
الفكره الأولى كات مقموصه
وحروفها مخاصمه الأحلام
ولا ليها مشاعر محسوسه
ولاتعرف معنى الإلهام
عن بنت بتحلم بالكوشه
تلبس فستانها ونغنوشه
وعريس يهاديها بفنكوشه
عاشت في الدور ع الأوهام
الفكره التانيه المدبوحه
عبت مناديلي دموع
عن بنت حزينه ومجروحه
محبوسه في قمقم مصنوع
وجمالها سبحان الخالق
وعليها ديابه بتتخانق
ملعون الفقر الخانق
حرمها الحب المشروع
الفكره التالته مكاتش حكيمه
كات فاتحه الباب للريح
كات طالعه ورايحه السيما
عايشه الأيام تفاريح
لبست توبها الفضفاض
ولاحست هم وفاض
وإيدينا الخاليه وفاض
محتاجه لمليون تصريح
والفكره الرابعه الحيرانه
تعبت م الفكر المايل
سرحت للغيط طمعانه
تخضر الأرض جمايل
نحصد من خيرها ونتدفي
نمسك بإيدينا الدفه
والضحك المرسوم عالشفه
يطرح ع الخد سنابل
الفكره الخامسه المبسوطه
دلتني على العنوان
زي القهوه المظبوطه
بتساعد ع الصحيان
فكتبت قصايد من نور
عن جنه وفيها الحور
وجناين طارحه زهور
وطيور أشكال والوان
والفكره السادسه لإلهامي
خدتني في سرب حمام
كان نفسي ألون ايامي
بخضار وابدرها هيام
وأنام وماليني الوجد
واصحى يحييني الورد
وأعيش الفرحه بجد
وأعبي الروح أنغام
على اول خيط من ضي الفجر
جالي الوحي معاه أفكار
وكان جوايا حنين للشعر
ولفين بيغنوا على الاوتار
...................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
ليست هناك تعليقات:
إرسال تعليق