شهيد على رصيف القطر .. للشاعر / حسن السحماوي

شهيد على رصيف القطر ..

...........

لحظة خروج الروح

واحتضار الجسد

لفى المدد جوايا ..

من جوه الكفن

والا ااقولك .. بلاش كفن

وبلاش كمان اندفن

ما أصلى ميت جوه منى من زمن

وماتصرخيش ..

الا فى صوت الصرخه ..

حايطلنى العفن ..

ما أنا اصلى .. مليش تمن .

وااه يا حلمنا الموجوع ..

يا أمى ..لو تسمعى صوتى فى احلامك

عايزك يا امى تفرحى .. وترجعى الموضوع

انا اصلى سايب حلمى على بابك

حتلاقى شبهى فى اللى جى كتير ..

حاتشوفى صورتى .. فى وش احبابك ..

أنا اصلى سايب مركبى ع الشط ..

ااخر سواحلى فى بحر اوصالك ..

مجدافى حاضن فى حدود الكف ..

وقلعى مفرود لجلك يصد الريح ..

ما انا كنت ناوى اعدى بيكى الشط ..

ابقى يا امى اذكرينى .. لحد ..

واحكى حكايتى .. واضحكى تفاريح

وبلاش تخبى لو العيال صاحين ..

دا النوم يغمض فى العيون لاتنين ..

قالوا مقدر سكتك للموت ..

وانا قلت جاهز ..بس ما فى شروط ..

من اصلى ميت والزمن حايفوت ..

يلا بقى .. مبقاش خلاص تباريح ..

وانا المسافر فوق رصيفى انحط ..

ومعايا زى يا أمى جنبى كتير ..

قالوا مقدر ينكتب لك خط ..

وبلاش تقولوا اللى مات دا قتيل . .

. أنا الشهيد مادد بطول الخط ..

انا المسافر وحدى وروحى دليل ..

قدامى الف شهادة بتقول حق ..

بس اوعى تحكى أوتقولى هزيل ..

انا عمرى كله كنت ليكى الشهم

بضميرى اعشق ضحكتك واصيل ..

ومسيرى جايلك يوم ميلاد الحق ..!

......................
شعر ..

حسن السحماوى ..