الميزان اختل
لما يبقى إللي منك ويجازيك بالعقوق
والكلمه طالعه غصب عنك وقلبه مليان شكوك
وأما تبقى الضربه جايه م إللي مفروض يلحقوك
ليه يقولوا علينا محتالين وكيان محتل
لما نسعى جاهدين لتوفير لقمه وغذاء
لما صوتنا اتنبح من كتر المناهده والنداء
عشان نغطيهم من برودة الطقس في الشتاء
يبقي اكيد الميزان كفوفه مالت واختل
ليه القلوب بتتحول من البياض للسواد
دا إحنا كنا دايما شاطرين ف كل المواد
ليه يبيعونا ويعرضونا روبابيكيا ف المزاد
دلوقتى بقينا لوغاريتم بدون حل؟
ليه المبادئ مبقتش هى الأساس
ليه الحكاوى بتبتدأ بكلمه ميراث
مفيش فرامل ع اللسان ولا حتى احتراس
كل كلمه طافحه شؤم وبتنز خل
ليه تحسسونا اننا مليانين عيوب
واللي كنا فاكرينه خير يطلع ذنوب
حتى الصواب يطلع خبيث ومينفعش يتوب
هشيم الحريق لما تقيد مفيش مفر
ليه تخلوا الوغد يشمت وهو أصله مولعها نار
بعد م كنا جامدين وعمرنا م عرفنا انكسار
ليه الحصان الجامح ف الآخر يطلع حمار
ليه الليل يفضل سواد ومش محتمل النهار يهل
،،،إيهاب السقا ،،،
ليست هناك تعليقات:
إرسال تعليق