عمل مشترك
معوض حلمي الفلاح الفصيحو الأم لولو
لحظة عتاب
هاخدك بعيـــد
لمراكب الحلم العنيد
لليالي حبست نجمها
لشموع بتنكر ضيّها
ولحب متغطي بجليد
هاخدك هنااااااك
عند القمر
عند الكلام اللي انتحر
عند الأمان اللي غدر
ولبيت ستايره من حديد
هاخدك لقلب بيحضنك
هاخدك لإيد بتطمّنك
هاخدك لروح اتعودت توهب
أناني يقولها:هل من مزيد؟!
انكش رفوف الذكرى واتحدّى الزمن
فوت كل ركن لبياعين
بيبيعوا وبارخص تمن
الليل ولا مرة صدف
يعشق صباح
وإن لاح شعاع الشمس
يتْرِجم الظلام
ويضيق على الحلم البراح
أنا فجر
أنا فجر محبوس
جوا خوفك من زمن
أنا بذرة مزروعة في كفن
أنا مستحيل افرح وأنا جنبك هنا
ضهري انحنى
باشرب بدل شهدك ضنى
وادفع من العمر التمن
ارجع بقى
ارجع لسردابك وخندق وحدتك
أنا جاية بس اشهّدك
كام حلم كان ينده عليك
كام فجر كان يتوضْا من نظرة عينيك
كام سطر حاول يكتبك
ويحنّي أفراحه في إيديك
فقدوا الأمل إنك تحس بحبهم
ترجع لهم
مابقاش في حرف بيشتهيك
ما بقاش في حلم بيشتريك
ولا ضلع مستنيك شريك
بقوا كلهم ضدك وأنا
عاجزة انفّذ حكمهم واغضب عليك
عاجزة انفّذ حكمهم واغضب عليك
..............................
.... زنازين القلق ....
عمري اللـي راح
لو كنتي فكراه فرق
كان زي زنازين القلق
عمري اتسرق
أنا كان في إيدي جوهره
غاليه نعم
كتر النعم يعمي القلوب
يملى توب الروح عيوب
يرميك في توهه وانكسار
يسرق النور م النهار
وانا كنت ناقص تجربة
وناقص علام
وكنت زي حصان جموح
من غير لجام
صفر ف ودنه الريح وطار
مغرور برنة حدوته فوق الرصيف
والزهو سيف
بيقفل بيبان الأجوبه
سايب مشاعره معلبه
وعماه بزيف الإنتصار
ولما طالت غربتي
وراحت لفييييين
صحيت مشاعري
وأججت شوقي الدفين
وناديت بعزمي ف البراح
أنا ولفي فييييين
ورجعت م السفر البعيد
جايلك وقلبي وحيد
مالهوش سمير
أبادلك ، نفس إحساس الألم
واكتر كتير
واعترفلك ، إن انا ف بعدك كسير
أو أسير مليان ندم
جاي م العدم وشعور مميت
شايل بواقي الحس
في الجرح الغويط
سارج شموعي ع الطريق
باجر في ديول الأسى
ونزلت دموعي
جاي أعتذرلك
واعزرك لو جرحك المفتوح ميدان
قفل البيبان ورفض رجوعي
منايا بس إن الأمل
يوصل في روحك ودها
ويسد في ظنونا الغبيه
ويسيب جروحنا للعتاب
يمكن ، يمكن تسامح بعضها
وننسى الأسيه
يمكن تسامح بعضها وننسى الأسيه
..............................................
بقلمي معوض حلمي الفلاح الفصيح
منشأة بطاش تمي الأمـديد دقهلية
ليست هناك تعليقات:
إرسال تعليق