(وقت الشدائد )
من سنين على حب كنا
ولا عمرنا على بعض هنا
كنت اقول انك أخويا
ولا حد قدر يفرق ما بيننا
ياما جمعتنا السنين
لو مرة غيبنا يشتعل بيننا الحنين
نقسم اللقمة سوى
والوجع ع الكفتين
يتقسم بيننا الهوى
نكتم الأنفاس تملي
لجل بعض كل حين
حتى ألعابنا سوى
وقت ما خدنا الدوى
حتى لو واحد هوى
التاني بيشيل الأنين
كنت أقرب من ضلوعي
من عقلي أو حتى كوعي
كنت مركبي وبقلوعي
دفتي لو كنت فين
حتى لما كبرنا وفتحنا البيوت
كنت أحلم أشوف ولادك
قبل لما كنت أموت
يوم نجاحهم كات سعادتي
تحضن سعادتك لو تفوت
كنت ديما أشوف ولادك
زي أولادي تمام
كنت أشعر بالأبوه
بكل فرحة وإنسجام
ما انت أخ والأخوة
في القلوب تعطي التمام
زارعين تملي بحبنا كل الشطوط
كنت مخزن كل أسراري وحياتي
لما أغرق تبقى قوة لطوق نجاتي
حتى اسأل ذكرياتك وذكرياتي
عمر ما اتحكمت بيننا الشروط
إيه حصل لك لجل تجري تضرني
تبذل المجهود دا كله لجل بس تشلني
حتى لو غلطان في حقك يكفي بس تهزني
مش تجيب كل السنين وبرجليك تشوط
في المثل قالو زمان والمثل ما خيبوه
الإبن يكرم مهما يعمل لجل أبوه
حتى لو شوفته في مصيبه
تجري تصرخ لا سيبوه
مش بإيدك تجري تجمع في الخيوط
لجل نفسك تحبسه لو كان برئ
حتى لو ما انتاش أخويا أو صديق
فيه بيننا عشرة طويلة جدا
تصرخ تقول إني في ضيق
مش تقول لي اني بحبسه أنا منوط
فين بقى تبقى الأخوة
أو صديق عنده المروة
يوم وقع صاحبه في هوه
غير يكون له الطريق
اللي يوصل به لنجاة
اللي يرجع به الحياة
اللي يوصل مهما تاه
اللي ينقذه من الحريق
حكم الأحبه تبينه بس الشدائد
و الأخوة تبان تملي وتبقى زائد
مهما كان البير غويط أو فيه زوائد
ترمي نفسك لجل تنقذ في الغريق
بس يا خسارة القناع طار في الهوى
بانت حقيقتك يوم ماكنت انت الدوى
روحت تجري لجل ديب شوفته عوى
وإتناسيت العمر كله وقلت ما اقدرش أطيق
المواقف قادره تكشف اللي كامن في الصدور
هي بس قادرة توصف اللي داير في العقول
مش هصدق حاجة منك مهما كنت في يوم تقول
من النهارده لا انت أخ ولا تنفع يوم صديق
.................... (شعر)...................
عبدالله السايح
ليست هناك تعليقات:
إرسال تعليق