اصعب شيء
لما تودع انت وروحك حد عزيز وتكون مضطر
لما تحس بإن غيابه بحر غريق وانك فيه مش لاقي البر
لما مشاعرك فيك تتفجر ومافيش واحد بيها يحس
لما تدوق م الشهد تلاقي ان الشهد ده اصلا مُر
......
اصعب شيء
لما ف عز زحام الدنيا تلقى الدنيا فاضية عليك
لما دموعك تنزل منك واللي ماسحها برضو ايديك
لما اعز حبايبك يمشي ومافيش حد يسد مكانه
لما بتضحك وانت ياعيني هم الدنيا بحاله ماليك
.......
اصعب شيء
لما تلاقي اللي انت وفيت له كان بينافق فيك ويغش
لما في حبك تبقى فولاذي وهو ف حبه بيطلع هش
لما ف يوم تقبل تتنازل علشان خاطر ترضي خسيس
لما بتفضل رغم ذكاءك انسان جاهل ما اتعلمش
...............
اصعب شيء
لما تلاقي الحلم بتاعك كهل وماشي بدون عكاز
لما تكون انسان متفوق وتكون راسب مش ممتاز
لما تنام مع صوت تنهيدك وتكون خايف يطلع صوت
لما الضربة لقلبك تيجي من ناس عاشوا العمر عُزاز
.......
اصعب شيء
لما تبص ساعات ف مرايتك وتشوف واحد غيرك تاني
لما تدوق الفرح بمبلغ وانت تبيعه لناس مجاني
لما ف كل دقيقة تفارق اللي حياتك واقفة عليه
واما بتوهب حد عواطفك فيكون واحد ندل اناني
........
هي رسالة وليكوا بقولها وعمري ماهيأس ولا املّ
انتوا جمعتوا الشوك بجدارة واحنا جمعنا عقود الفل
احنا وصلنا لشط اماني وانتوا وصلتوا لشط سراب
احنا الناس الطاهرة عموما وانتوا الناس العايشة بغِلّ
ليست هناك تعليقات:
إرسال تعليق