جرى إيه
معقوله كل البشر
تايه معالمها
كل الخلاف إنتشر
والشر مراسلها
حتى القلوب من حجر
يملأ السواد نيلها
جيران وبينهم ضجر
طاب مين وهيشيلها
قطعوا خلاص الشجر
مات الورق طولها
فوق اللسان تنتحر
في الطيبة محاصيلها
كان فيه زمان إخلاص
حب وسماح وخلاص
كل البيوت مفتوحه
كل القلوب إحساس
في الفجر نتجمع
على ركعتين لله
وبالودان تسمع
صوت الدعاء ورجاه
والشغل عند فلان
مسكين وكان عيان
شغله يقوم يلقاه
من غير فلوس ولاجاه
تشهد شوارعنا
في القعدة بتساعنا
كل الهموم تتوزع
وتموت أوجاعنا
في القعدة وبننساه
الايد بتعطي الايد
بالحب والتوحيد
أطفالنا حوالينا
فرحانه زي العيد
وقلوب بتنسى الآه
من كل بيت تلقى
طبق وكوبايه
وقلة تدور مسقى
بعد غدوايه
الكل يسعى يجيب
من كل حاجه حبيب
حتى يفوت الغريب
يلقى المكان داية
بصله وحبة مش
جبنة وملح ترش
وعيش بدون الغش
معجون بضحكاية
كل القلوب فرحة
رجوله كات طرحه
ستات وبالطرحة
في الشمس ضلايه
وعيون ما فيها تخون
ماتشوفش راجل دون
ولاست ليها زبون
ربك وكان العون
والرحمة في حكاية
تسأل على الغايب
في قلوب وله نايب
ولا فقره كان عايب
حتى لو خايب
له القلوب آيه
بتشيله في الشدة
لا عتاب ولا حدة
تزرع له في مودة
بينهم وله حماية
يا ساقية لفي ودوري
خليني أروي في دوري
كل الغيطان خضره
فيها القلوب لولي
مبدورة بالقدرة
والخير وله رايه
راح فين زمان قول لي
مش لاقي له حلي
لا أخ ولا خلي
ولا كلمة بتحلي
في دنيا آسايه
عبدالله السايح
ليست هناك تعليقات:
إرسال تعليق