طعم الجوع
وح اقولك أيه ؟ عن طعم الجوع
او هو يقولك عن طعمي
ما انا أصلا ضرسه اما مضغني
لقىٰ طعمي مِمَرر طلعني
إتمخض قال ينعل امك
ساب جرحُه فقلبي اللي واجعني
مستني الباشا أما يضحي
من بعد ما سَمّن في بقرتُه
بقالها سنين واكلة ف ارضي
ولا دُوقت حليبها ولا شربتُه
يمكن جلدها يوم يكسيني
ويغطي البرد اللي كاويني وسط الإشارات
يمكن يرمي لي كمان عضمة في يوم لنتخابات
ملِّيت الكلمة الحمضانة عن شد الحيل
راح اقولك ايه عن هم كبيروصراخ وعويل
عن رأي إن قرر يوم يطلع يبقى ب ترحيل
عن منفى ومعمول خِصيصًا
لضماير دايما كات سارحة
ف كام حلم جميل
عن عطش النيل أما بينشف في دموع العين
عن لعنة كرسي في تنجيدُه يريح ملاعين
عن تمن الفرح وتجميدُه في بنك المايعين
عن سعر الشروة الطمعانة
و ممالك اصلا بيعانا
في سوق كله عبيد
عن شجر الدر اللي ما ضلل
و رشنا ب مُبيد
عن حلم خيال ساكن قطاي
ومعشش جوا دماغ أيبَك
عن وعد وكان دايمًا نسَّاي
وقت الجد ياكل نايبك
راح اقولك ايه؟ عن إيه تاني
دي حقيقة بجد معانداني
لو عايز تعرف شئ تاني
على حيطة السجن تاريخ اهلك
ليست هناك تعليقات:
إرسال تعليق