روحي تايهة في الملكوت
شرودها في الذكرى بكاني
صبح كل صوت مكبوت
تفوت ناره في وجداني
بقيت شايف في عمياني
حاجات مابشوفها بعنيا
باشوف البعد دا جاني
عشان متساب لوحديا
عشان غَرَّق مراكبيا
وكَسَّر فيَّٰ مجدافي
بقسوة شد حنية
وحمل همُّه على كتافي
مكانك ع السرير دافي
كأنك لسه ب تِودُّه
وريحة مِسْكك الصافي
معبي خام الشقا منُّه
بشوف برشامك الموجوع
دموعه في كوباية مَية
بشوف عكازك المنزوع
وحيد في رَكْنة مَنسية
ياأول كتف في صلاتي
ياطُهر المية في وضوئها
ياتكويني مابين ذاتي
ياشمس حياتي وشروقها
مكانك يابا هنا ف قلبي
ف خد راحتك وع الاخر
وهدي من الزعل نبضي
عشان اليأس ده كافر
وتعالى كل يوم زورني
واحشني كل تفاصيلك
بلاش بقى يابا تهجرني
لغاية ... يابا ما أجيلك
ليست هناك تعليقات:
إرسال تعليق