همس الولد
للبندقية ف ودنها
يوم ما انجلد
علشان بلاد بيحبها
وبكل شوق بيقولها
راجع ف يوم
آخد بتار اللي انقتل
وأقتل هموم
فوق الكتاف زي الجبل
راجع ف يوم
أعلن قدوم شهر العسل
ضحكت عيون البندقية
م الفرح
واتبسمت رغم الألم
علي اللي مات واللي انجرح
وبسرعة قامت شمرت
واتحضرت
فوق كتف حاسس بالوجع
قالت معاك
مطرح ما تبقي يا جدع
ناخد بتارنا م التتار
ونهد أركان الفزع
آن الأوان
يخرج بارودي اللي انحبس
آن الأوان
أشوف أدان يحضن جرس
آن الأوان
ينطق لساني اللي انخرس
هم الجميع
حتي الرضيع علي رملها
قال الجميع
لازم نرجع أرضها
علشان قلوبنا تنشرح
ويعود لنا طعم الهنا
ويعود لها نور فرحها
مين غيرنا مين
كان بات حزين
لما انسرق
نور القمر من حضنها
مين غيرنا مين
طول السنين بيحبها
احنا الجنود
اللي ما تعرف مستحيل
قادرة علي
كل الموانع والسدود
وعندنا مليون دليل
روحوا اسألوا
فرس وتتار
مين خلي كل الارض نار
روحوا إسألوا ليلنا الطويل
يوم م اتولد لينا النهار
احنا الجنود
اللي ما تعرف مستحيل
مين غيرنا مين
قطع ايدين
خط اتوصف انه الحصين
مين غيرنا بكا عين شارون
مين غيرنا بكا عين رابين
روحوا اسألوا حتي اسرائيل
مين كان عبر قلبه القناة
مين كان مناه
يموت شهيد في حضنها
روحوا اسألوا يارب العلم
ورمل سينا اللي انظلم
تلقوا انكتب علي رملها
من دمنا
مليون دليل
علي إننا احنا الجنود
اللي ما تعرف مستحيل
رضا أبو الغيط
ليست هناك تعليقات:
إرسال تعليق