جرعة مُر
************
مطلوب ندوق المُر
ونصب منه كاسات
لجل الحياه ما تِمُر
ونودع الأموات
ما هو اللي مات
كان مات
علشان ندوق الشهد
واحنا لا دُقنا الشهد
ولا حتي دُقنا فتات
كل اللي زاد ع الخد
كام دمعه ع الأموات
والدنيا ما بتسُر
كل اللي عاشها ساعات
حتي الضمير الحر
م الظلم ولي وفات
وللا عادش غير الذل
وبنود آخرها سكات
الساقيه صابها جفاف
والكل عاد بيخاف
والهُديه جنب الناف
مش لاقيه بر أمان
وللا توته لجل تبات
الشمس صابها كسوف
وقمرنا بات مخسوف
وبسيف مايعرف خوف
عقلي السليم إتهان
وانشل م الأزمات
وعشان طلبنا نعيش
وننول رغيف العيش
ونغمسه بأمان
قصوا لحلمي الريش
واندفعت البقاشيش
لجل اللي عاش يتهان
فعشنا كالأموات
من غير دفا الأكفان
حتي اسألوا الخلان
والأهل والطرقات
واللي اتقتل ف ميدان
واللى ف كمين كان مات
قطفوا عيدان الورد
قبل الأوان بأوان
علشان يعلوا السد
ومدافن الأموات
الحلم فينا اندفن
وحياتنا صبحت عفن
رجاله أو ستات
من يوم ما فوتنا الشر
ينخر.. ف جدر البيت
ويوزع النفحات
من يوم ما فوتنا الشر
يملا كاسات المر
ويصلي ع الاموات
واحنا اللي شوفنا الشر
دايما بيولد شر
يكبر ف حِجر شيطان
وترضعه الحيات
يا مغمسين العيش
ببواقى طعم المُر
والدمع قطر أهات
علشان نفوت ونمُر
وندوق من اللذات
يلزمنا جرعة مُر
تحيي بواقى الذات
***************
للشاعر / رضا ابو الغيط
ليست هناك تعليقات:
إرسال تعليق