"خلاص مليت.."
يغور الشعر لو ليكي
تحبي أبوس علي أديكي
سبيني أنا مني للأشعار
وماتحطيش أياديكي
لا ح اكتب فيكي أيها بيت
وح امشي بشعري جنب الحيط
وح اوهم نفسي إني نسيت
قصيدة كتبتها فيكي
ماتستهليش عذاب فني
ولا انتي العين ولا النني
سبيني وأرحلي عني
خلاص مليت أعيش بيكي
لا ح اخدع مرة أحساسي
واقول حبك علي راسي
وانا شارب مرار كاسي
وقاتلاني بأياديكي
لو اكتب غصب عن عيني
لا بحر ف شعر ح يجييني
ولا قافية تواسيني
وانا بكتب لأرضيكي
ياقلمي قول وفهمها
عذابي كتير قوي منها
طب أكتب أقول أيه عنها؟!
غير أن القلب ناسيكي
ويغور الشعر لو ليكي
تحبي أبوس علي أديكي
سبيني وأرحلي عني
خلاص مليت أعيش بيكي
خلاص مليت أعيش بيكي
.....................................
تحياتي.. الشاعر والمؤلف :
حسن عمران.
ليست هناك تعليقات:
إرسال تعليق