الاثنين، 12 مايو 2025

هو وهي في زمن المرازية ... بقلم الشاعر/ عبدالحميد سالم /// تصميم الفنان كمال العطيوي

 


هو و هى

 في زمن المرازية  

 

هى

انا نفسى يا راجلى جت ع اللحمة

مسلوقة أو مشوية على حبة فحمة

شكلى يا حبيبى حامل بس يا خوفى

من وحمتى إبننا ينزل فيه كذا وحمة

هو

لحمة مين يا ماما م تتوحمى على قدك

لو على رغيف حوواشى وان كان عجبك

وان شا لله ياشيخة يكون من لحم حمير

ليه تفكرينى بيها قومى نامى الله يهدك

هى

طب عايزين نصيف ولا برضه حرام

يقالنا سنين عمالين نشد ف الحزام

وكل سنة تقول السنة الجاية ياماما

وآخرتها شكلنا هنصيف ف الحمام

هو

شكلك يا مدام ع الصبح فايقة ورايقة

مش شايفة الناس كلها بقت متضايقة

وف الشارع م الهم ماشية تكلم نفسها

بتخانق دبان وشها ولغيرها مش طايقة

هى

مالك كده يا راجل كرهتنا ف العيشة

حتى الاجهزة فصلتها وشيلت الفيشة

مش ناقص غير إننا نأكل ف الضلمة

كفاية دهبى بعته م خليت منه غويشة

هو

احمدى ربنا يا هانم إننا عايشين بالستر

محنش حمل مرض لكن مقدور ع الفقر

وان شاء لله هيعدلها من ببده الكون

تفاءلى ف بكره يا هانم بس شوية صبر

هى

صابرين والله يا حج هوا الكلام حرم ؟

ربنا قادر يفكها ويوعدنا بزيارة الحرم

وزيارة المصطفى عليه الصلاة والسلام

وده هيبقى كرم من ربنا مافى بعده كرم

هو

يسمع منك ربنا يا حاجة هوا د الكلام

مش اكل ولبس وفسح وعيشة والسلام

وربنا يديم على بلدنا نعمة الأمن والامان

وكده رضا قوى ياحاجة و ياللا حسن الختام

هى

حسن الختام إيه يا راجل إحنا لسه شباب

ملعون ابو الهموم اللى خلت شعرنا شاب

تعالى ننساها ونعيش ف الدنيا يوم بيوم

وبكره بإذن الله هتفرج من أوسع الأبواب

 

ليست هناك تعليقات:

إرسال تعليق

فن البوستات كمال العطيوى