ولما كان العيش قُليِّل
والعيشه كانت مُقنِعه
ع السفره كان صنف الغُموس
النظره منه مُشبِعه
والحَله يِدُقُوها الجيران
واللُقمه بتسد الجعان
والبركه قاعده مرَبَعَه
...... كانت حياه
الشاي يلف لألف إيد
براد بيكفي المصلحه
تحس إن الدُنيا عيد
لو فرخه جايه مفحفحه
وقلوب بتحضن في السلام
والطيبه فعل ومش كلام
والأدب قبل العلام
والكلمه طالعه منَقَّحَه
..... كانت حياه
لما كان الجِد جَد
كلمته ولأي حد
سيف وقاطع فيش كلام
لما يوقف للسلام
يبقي بينا ألف حد
.... حد
يِبقي واقف.. تُبقي واقف
م الرجال طبع ومواقف
.... حد
إسمه دا الكبير
إسمه سابق أي حد
أيوه جَد
......... كانت حياه
كانت حياه سهله وبسيطة
ألف نقطه ع الخريطة
لفت الدنيا ودارت
والطمع.. وقلوبنا جارت
عَجِّزنا وي قبل الأوان
طز في الدنيا العبيطه
ضيعت أيام زمان
......
ليست هناك تعليقات:
إرسال تعليق