........ رحايه وزير ........
زماننا الحــالي حــــــدوته
بيبيع الضــــله والتـــــوته
وضحـك الخـلق ع النـوته
وبنـوته وواد عاشـــــــــق
بيبنوا م الأمـاني بيــــوت
وتاه الحـلم ف الملكـــوت
مع خيـوط الوفــا كــــروا
تجيش ننسي سنـين مروا
مابين الفحـت والتـجريف
ونسـرح صحــبه ع الكارو
ونتـــذكر جمـال الريـــــف
تجيـــــش نقـــلعها لبـلابه
وأي حشيـشه كــــــــــدابه
ونقــني جامـوسه حــلابه
وصبـح وعصر تحلـب لك
ونعـــمل لك لبن رايـــــب
وقشـطه تطـري عـلى قلـبك
وتدي للجــــيران منــابات
ونحكي ع الجسور حكايات
على مطاوع وستي بهات
وشمس الضـهر لو جمـره
وجـمع القطـن ف الشـمره
وسـمره بيرازيـها غفــــير
تجيش نصنع رحايه وزير
عشان نطحن نياب الزور
ونسقي العطشانين للنور
وبعد الجــور يزول الهم
تجيـش نتلم في الحاره
وجـاره تنــــادي للجــاره
ونعــمل غـــدوه جـــباره
بجبــنه قديمـه وبصــاره
تجيش نسرح سوا معاهم
وناخـــد إيدنا بإيديـــهم
معـــانا الحـــبل ومحشه
عشــــــان اللـم والحـشه
ونتجمع ف غيـط عتريس
على جمال العـرب نرفع
شنيف غله وحمل دريس
تجيش نرجع نضم القمح
وضـــم الــرز انا وانــت
على الراميه ونرمح رمح
ونتهـنى ببراح الجــــرن
تجيش نرجع ونزرع قطن
وتروي عطشــــنا مــلايه
ونعـمل كوشــه ع الكنـبه
عليــها جــريده ومــلايه
ونقـعد صحــبه نتعــشى
تجيش نتمـشى ع الترعه
مابين الشــــط والزرعــه
هناك نلـقى البنات فـرعه
بنات في الأرض مبدوره
بيمــــلوا القــلـه والزلــعه
ورب الخــــلق ياقنــــاوي
بدرهـــم ليـنا بالتــــــورة
هاتلـقى الراحـه لـو ناوي
هــوا العصـــريه بيـداوي
على المورده حدا الساقيه
تجيش نعزق خطوط باقيه
لولد الولد في المـواريث
زهقـنا من بلاوي الفيـس
وشحــن النــت بالجيــجا
ونشـرب خوفـنا تحويجه
تجيش نلعب دورين سيجه
...................................
بقلمي خون أنوب الجديد
معوض حلمي الفلاح الفصيح
منشأة بطاش تمي الأمديد دقهلية
ليست هناك تعليقات:
إرسال تعليق