أنا الدنيا
وبتشاور عليكِ الدنيا بعيونها
وبتشِدِك لها ف ثانية
وتنسي الماضي والحاضر
طريق مطعون ف كل خطوة بخناجر
طريق مسطول وبيكابر
وترمي زهرها ليكِ
وتلعب بيكِ ع الوشين
ف ثانية تبقي محبوسة
ف خانة الَّليَكْ
وترمي الزهر من تاني
تنادي عنيكِ وحشاني
وتضحك عينِك الحلوة بضحكاية
ماليها الشَّك
ويمكن تيجي ف الشيش بيش
لاتلقي حُب ولابقشيش
وتِحْدِف نظرة ف الوِنجين
وقلبك هتلاقيه ف الجُون
تشوطهولك ٢٠٠مرة
ويطلع حزن م الجَرَّة
يِصَقَّف ع اللي راح مِنِّك
ويلبس توبِك الفضفاض
وتبكي عيونِك اكْمِنِّك
دموع روحِك ف نيلها فاض
وتجري الدنيا وتسيبِك
لسانها يبص براها ويلعب
بالهوا ف إيدك
وتِنْدار ليكِ وتغني
بأمر الحب والأشواق بعيد عني
أخدتي م الهوا ومني
كفاية عليكِ واتاخري
ده انا آخري
راح اغدر بيكِ وف ثانية
أنا الدنيا
ليست هناك تعليقات:
إرسال تعليق