بلاش دلوقت تتحجج
وتتلجلج وتتلكك
إياك فاكرها بقى غنيمة
وإنك معاها هتترستك
هتاخد بالرخيص عمرك
وتديك كام الف متأستك
محدش فيها بيشكك
وبيسلف أمان للغير
ياواد الغربة بتشكشك
تدق ف القلوب مسامير
ليلها يكون بُكا عالي
خطاوي تهدها المشاوير
يابني العمر متعقرب
بيفوت مننا ويهرب
عايزني اموت بعيد عنك
وانت تموت لي متغرب
يابني إمتحانا متسرب
ولجنة الحياة مجاميع
عمر فلوسها ماتقرب
ومنبتها من التوديع
تِحرم عليَّ بقى فلوسها
ولو محتاجة أكل وبيت
والقرش اللي هتجيبه
لوصبحت يابني مشيت
دي حداية ومابترميش
حنان وامان ولا كتاكيت
فراق فلوسها لو جمع
أكيد قبل العزا توابيت
ليست هناك تعليقات:
إرسال تعليق