يوم ميلادك يا حبيبنا
له ُ جماله ُ و له ُ سروره ُ
يا مُحمد يا رسولنا
نفسي أكتب شيئ واقوله ُ
و اللي يكتب ليك يا سِيدنا
شيئ مُشرف نفسي انوله ُ
بس هطرح السؤال
اللي هوه مالوش جواب
مين هيكتب إرتجال ؟؟ !!
فيك يا طه يكون صواب !!
وانت وصفك شيئ مُحال
بعد وصفك في الكتاب
زَينولي الشعر كله ُ
واكتبولي من بحوره ُ
اختارولي الحلو منه ُ
واوصفولي ازاي هقوله ُ
نفسي أمدح بيه مُحمد
لو هنفضل عام بطوله ُ
رتبولي في الحروف
قسمولي في القوافي
والمعاني تكون صفوف
اللي ظاهر واللي خافي
إكتبولي في السطور
إن إسمه ُ لوحده ُ كافي
إسمه ُ يملى الكون دا نور
ولقلوبنا بيبقي شافي
يوم ميلاده ُ نور تَجلَّى َ
لما جالنا بالهداية
أي مسلم مهما صلّى َ
طول حياته ُ وللنهاية
مهما زكَّى ولا صام
ولا سِهر الليل و قام
ولا يُشكر ع الدوام
فضل طه على الأنام
مهما نشكر مش كفاية
الشمس ضِحكت للقمر
و بتبتسم فرحانه بيه
مبهوره إنه ُ في يوم قِدر
من مُعجزة انشق ليه
والجِزع مبسوط و افتكر
الدمع كان جوه عِينيه
ونبينا شافه ُ وراح جَبر
مَد الإيدين طبطب عليه
وملايكه واقفه كلَّها
الأمر جالها إنَّها
ربك لوحده ُ قالَّها
سِيدنا النبي صلوا عليه
ليست هناك تعليقات:
إرسال تعليق