ليه سايبني
......................
ليه يا واد ماشي وسايبني
ليه ياواد دايما تاعبني
لسه سايق في العناد
لسه ليه جافي يا واد
لسه قادر ع البعاد
لما اقول لك إبقي جنبي
تقولي يا أمَا أحمي البلاد
لسه ب الأسابيع م اشوفك
لسه شامّه عِطر طِيفك
وأنت ذي اللعبه ف إيدي
نونو أد الشبر ونص
لسه دمك ده ف وريدي
عيني ف عينك لما أبص
أوعي تقول يا واد كِبِرتْ
مهما خَطِتْ فيك شِنَاب
وأنت في سن الشباب
برضو لسه ف عيني عيني
برضو لسه ف عيني نِني
مهما كنت ومهما صِرتْ
ليه الهموم متقولي مالك
تكونشي البت إل خَطبهالك
أوعي تعول هموم يا واد
في الأجازه الجايه نِفرح
وتبقي يا أبني مكتبوبالك
منا زي زمان م شيلتك
برضو يا أبني هشيل عِيالك
لسه برضو ناوي تمشي
لومصمم سيب لي صوره
خلي بالك م إل قطوره
خلي بالك م الطريق
ولما تختار الرفيق
لما تختار الصديق
ولْد ناس وإبن الحلال
الصداقه... مُش بِمال
الصداقه تكونو واحد
أوعي مِ الصُحبه الشِمال
كون راجل مُطيع ياواد
نفذ الأمر بشجاعه
تبقي راجل في الميدان
لما تقضي الجيش وتيجي
جاي ومعاك لي 100 نيشان
تبقي أنت واد بريمو
تطلع الاول.... ياواد
.....
...يا أمَا يلا سيبيني امشي
....
برضو مِستعجل يا واد
طاب خليك معايا حَبَه
عايزه أشبع مِنّك شِويّه
طاب أجيبلك بق مِيّه
طاب أحشي لك رغيف
بدل متاكُل ع الرصيف
دافسه الكنكه في الرماد
بق شاي يعدل دماغك
دا الطريق لساه طويل
إقضي كل أوقات فراغك
في القران يا أبني جميل
....
......
....يا أمَا يلا سيبني امشي
....
طاب خلاص سَمَعني صُوتك
كل ما تِسمح ظروفك.. رن لي
إستخبي حتي خلف الدبابات
ورِن لي...اصل صوتك دا ف بعادك
سلوي لي..بيسليني..أصل بيتنا
لما تمشي يكون سكات ..هُس هُس
مش بنسمع حتي حِس
مانت حِس البيت ياغالي
.....
يا أمَّا يلّا سيبيني امشي
....
ياأمَّا يلا سيبني أمشي
دا الوطن بينادي فينَك
وإن مجيتش ظُبِّي نعشي
وبالشهاده تسد دَيْنَك
دَيْني يا أمَّا للبلد
ليها دين عَليّا جامد
وإسمي فيها فوق جبينها يِتْخَلَد
والمولي عليّا شاهد
مش هفرط ..شبر منها
دمي أفدي الكل بِيهْ
.....
يا أمَّا لما تشوفي نعشي
اكشفي وشي وبوسيه
......
حسبي الله ونعم الوكيل
.............
رحم الله شهداء الوطن
....
سيف عثمان
.....
ليست هناك تعليقات:
إرسال تعليق