الوضع خرج بقى بره الطوع
و الفرح سايبني سنين ملطوع
وقانون الليل بقى كله عوار
مانصفش الشمس بصفر سطوع !
.......
ولا جدو صبح بيقول حواديت
ولا لمة عيلة بتسعد بيت
الحب ياناس م العقد فرط
والنخوة اتباعت بالقراريط!
....
واصحاب بيبيعوا سنين بفلوس
وماعادش قيام بقى كله جلوس
ومافيش ع الارض مكان لامين
الكل إمام اما احنا لصوص!
.....
صوت المزامير بقى صوت مخنوق
والدوشة اغتالت اي هدوء
وشريط القطر مالوهش امان
على قلب القطر يروح مزقوق!
......
خالية البساتين من اي ورود
والدنيا رصاص وانا قلبي بارود
وقلوب الناس قفلت سوقها
مابقتش بتقبل اي عروض!
....
ماشية المخاليق من غير اخلاق
وبَهار الفرح مالوهش مداق
ولاقصص الحب بقت صادقة
ولا قلب العاشق بقى يشتاق!
......
والام تنام وسريرها رصيف
وطابور العيش مش بعده رغيف
والدنيا بتضحك للي معاه
وبتقلب للي مالوش اشكيف!
......
النيل ماشبعش من القرابين
والبرد ف ايده يادوب شرابين
وعروسة الشام عمالة تتباع
من غير لا مقدم ولا عرابين!
......
وولاد الناس بتبيع مناديل
والاخر عامل نفسه دليل
وابن الجعانين اللي مايسواش
بقى باشا وبيه بعد التعديل!
......
وشباب ماشيين تحت التخدير
وكبير البيت مابقاش بيدير
والشخص المخلص بقى نادر
بقى صنف وقابل للتصدير!
......
والطرق السالكة مابتوديش
والرايح رايح ومابيجيش
والتافه ساكن اعلى مكان
وفقير بيموت علشان بيعيش!
.....
بهتان الليل مش لاقي نجوم
والأُنس دفاع والوحدة هجوم
والذكرى ناقوس عمال بيدق
على عقل الروح عمال بيحوم
.....
الوضع غريب والحال مقلوب
والناس مابقاش ف ضلوعها قلوب
ونصير الحق صبح عريان
ونصير الشر لابس لك روب!
ليست هناك تعليقات:
إرسال تعليق