ياأيها الحق الذي قد ضاق ذِرعًَا بالاساءة فاختفى
هل بالسكوت رأيت خالٍ من آثار ضرب القفا؟!
الصبر اوقات لو يطول بيكون ساعات ضعف وهوان
وان كنت كافر بالعلاج فازاي تقول نفسي ف شِفا؟!
.......
هي الصلاة تُحسَب صلاة لو منها غاب فرض العِشا؟!
وعشان نشوف للكيك قوام لازم نضيف حبة نشا
واليأس لو للذات وصل يبقى الامل لازم يموت
الفُجر جاثم ع الوشوش مابقاش يموت اللي اختشى!
.....
انا سبت روحي فوق ضريح واحد يبان افضل وَلِي
ووهبت قلبي للخسيس علشان ياخيبتي ماتزعلي
طلع الولي زي الخسيس والفرق بينهم في الحروف
وطلعت انا مااسميش سمير ولا جد جدي كان علي!
.....
انا نمت مرة ف السويس وصحيت لقيتها القنطرة
والروح جذورها ف بورسعيد والقلب نازح من طُرة
انا كنت عالِم ليه تاريخ وليه بحوث في الطبطبة
وحاربت كل الفيروسات ماماتتش ليه بالبسترة؟!
.....
وسندت دقني ع الهرم وعينيا كانت ع الآثار
وبعَتّ روحي لعين جالوت علشان تحارب ف التتار
ومشيت برجلي ع الحدود لحد اطراف السودان
ورقيت عيوني بعود بخور والخوف عملت عشانه زار!
......
انا شعري نازف هم خام والحبر عاجز يسعده
وانتوا المشاعر من رخام عن حرفي لازم تبعدوا
الشعر مش رص ف كلام الشعر اكبر موهبة
الشعر يمرض قلب ناس ويداوي ناس لو يمرضوا!
ليست هناك تعليقات:
إرسال تعليق