ما فيش فايدة
قلوبنا مهما بتقدم
فروض الصدق والإخلاص
بتلقى كفة النكران
في الآخر تقوم زايدة!!
ما فيش فايدة...!!!
لا إحنا بنتعظ مالغدر
ولا بننفخ في صهد الوصل
ونحاذر بأشواقنا
اللي مش لافة ولا دايرة
ولا عارفة تكون باردة!!
ما فيش فايدة..!!
نكدب في الهوى عيوننا
ونكتم صوت عقول راجحة
عشان نوهم نفوسنا
وبرده نتألم بصوت مكتوم.
ونرفض في القصاص
دية هوى قلوبنا اللي متعاهدة..
مافيش فايدة...!!!
سؤال حاير...
ومش لاقي الإجابة
الشافية لجراحنا وأوجاعنا
ودمعه نفس مقهورة من الخذلان
وقاعده جنب حيط العمر
مذعورة ومتأخده !
ده كله ليه؟!..
وهي قلوبنا وقت الصدق
محتاجه من الأكاذيب
ومن الألاعيب تحط التاتش
وتزين نفوس هربانه من الوحدة؟!!
ده طول الصبر علمنا
بإن الدنيا مهما تعطي بخلانه
ومهما نخوض بحور المال
ونطلع درجة التتويج
ونلبس تاج من الشهرة
ومن الأحساب ومن الأنساب.
.ومهما تحوز إيدينا كنوز
ننول و نفوز
نلاقي نفوسنا فى الآخر ..
لده زاهدة!!
وغاية قلبنا المسكين
يلاقي الفرحة وتطبطب
على حلمه عينين صادقين
تضلل عاللي عدى وراح
في سكة نصلها دباح
وتوهب له الوفا قناطير
من الأشواق نيرانها
رغم ريح البعد
يلقاها الحنين قايدة..!
تعالوا نصون دفا نفوسنا
ونتحوصل..
ونقفل كل أبواب
الهوى المكسورة ترابيسها
ونرضى بالنصيب الأعرج
ونتعكز على حالنا
لأن حقيقي مش فاضل
في روحنا حيل
لا لمشاكسة ولا مناهدة
وشكرا يا اللي رمتوا لنا
شباك الوهم مليانه
من الأكاذيب ما يكفينا
سنييين وسنبيين ..
ويعطينا الدروس دمعات
بتغسل ذل أيامنا
اللي جرحتنا بأشواككم
وكانت على الالآم شاهدة..
بقلمي عبيرالصلاحي
من ديواني تعال أما أقولك
ليست هناك تعليقات:
إرسال تعليق