باعرف عيون لما تشوفها تتوه
زي اللى واقع م السما إتلّقّوه
الله عليها وخمسميت أيييوه
بتسبب اثر جوه القلوب وتعلّم
بتحس منها السحر باين فيها
تاخد القلوب فوق السما وترميها
واتجمعت كل القلوب حواليها
لاخرس يشوفها من العجب يتكلم
واعرف عيون تجرح ومش بتداوى
واعرف عيون بتقول حكم وغناوي
واعرف عيون تسحر عيون الحاوي
وعيون تشوفها تمد ايد وتسلم
واعرف عيون فيها السهام غدارة
بتصيب ما بتسيبش وراها اشاره
وعيون تقفل ألف بيت مع حارة
وعيون بتحسد حتى لو كتكوت
وعيون رموشها بنظرة بتجيب داغك
وعيون تشوفها تجيب صداع لدماغك
وعيون حارسها الرب دي علشانك
من نظرتين منها تطب تموت
وعيون تسبح للعليم فى سماه
وعيون بنظرة عين تقول الله
وعيون تصيب حتى اللى مش شايفاه
وعيون تقول ان أنت واد هلفوت
ليست هناك تعليقات:
إرسال تعليق