الشمس لما روحت
سابت شعاعها ف قلبنا
ووعد تفضل جنبنا
طول ما احنا بنحب الوطن
وبنستحى من ربنا
طول ما احنا بنضحى عشان
تطرح بذور نبت الأمان
جوه قلوب كل الجيران
وعيون بتعشق مصرنا
متكحله من رملنا
طول ما احنا هنا
رافعين شعار رمز العمار
على أرضنا
وغرضنا نسعد أُمنا
طول مااحنا جاهزين كلنا
نضحى ليها بدمنا
الشمس لما روحت
استسمحت
نيل مصرنا
يخلى باله من عياله الطيبه
وقالت له من بدرى هكون
جنبك هنا
لجل الشراقى ترتوى
وتهادى من طينها الهنا
للطيبين من أهلنا
ايدى ف ايدك نبتدى
الرحله من جنب والهرم
ونزور بيوت كل العرب
ونصلى بيهم ف الحرم
يمكن ف يوم نرجع وطن
ونعيد تاريخنا ومجدنا
وخريطه واحده تُضمنا
ما فيهاش حدود
تفصل مابين
العدل ...وسنين الحنين
ولا فيها خوف
ولا مُر جوف
ولا سهم يجرح مشتاقين
تبقى العروبه رمزنا
ونكون لها وتكون لنا
طوق النجاه
شهد الحياه
حبل الوداد اللى مناه
يوصل مابينا كلنا
...............................
للشاعر / رضا ابو الغيط
ليست هناك تعليقات:
إرسال تعليق