قولى لى ..... م. فهمى على نصر

قولى لى افضل كدا لامتى 
تقولى جاية و استنى 
و اعد ايامى بالثانية 
و فيا الروح بتتمنى 
اشوفك بس بعيونى 
و اشمك نسمة و تفوتى 
بلاش يعنى تكون احضان 
هاسيبك تسمعى سكوتى 
هاقولك فيه كلام ياما 
و هاحكيلك تعبت ازاى 
ف بعدك كنت غير نفسى 
بقيت صامت أوى و نساى 
هاقولك لما بتغيبى 
باتوه حتى ف عنوانى 
و باب بكره و انا معدى 
بيرجع يتقفل تانى 
و كل الخلق حواليا 
باشوف ف عنيهم أوجاعى 
ف نظرتهم باشوف شفقة 
عشان دايما مانيش واعى
....................................
للشاعر / م. فهمى على نصر