بترن عليا من النجمة
وبصوت كان تايه ف دموعها
بتقولى ألو
محتاجة أشوفك ياحماده
وبلاش من فضلك تكتب لى
ع الواتس رسايل بحروفك
م انا اصلى
مش واحدة بتفرح
بغناوى الشعرا وحكاويهم
ولا قلبى
كان فاتح بابه
لأحبابه.... علشان يغويهم
انا بنت العيلة اللى ما تعرف
غير شرع الله
وكتاب وشهود
وافراح وورود
تجمع قلبين على حُب الله
ف زمان غدار
بيبكى عيون على وتر العود
وبيبنى سدود
بين قلب هواه يلمح طيفك
وعيون مشتاقة تكون لعينيك
قمراية الليل السهرانو
بتطرى الحر اللى ف صيفك
من فضلك استعجل حبة
وبلاش تتحجج بظروفك
انا بنت بتغرق م الحيرة
ف بحور الخوف اللى مانعنى
اتكلم تانى
انا حد بيسرق أحلامى
وبيكتب من دمعى أغانى
من فضلك استعجل حبة
وبلاش تتأخر يا أنانى
مش عارفة ازاى عينك نامت
وانا عينى بتسهر صباحى
وجراحى بتحلم بقدومك
مش عارفة ازاى قلبك طاوعك
تنظر بعيونك لأمانى !!!!!
مش عارفة ازاى قلبك طاوعك
تنسانى لو حتى ثوانى
وانا قلبى اللى ما حبش غيرك
بيداوى جراحك وهمومك
من فضلك
حاول تتذكر
الوعد اللى ما بينى وبينك
وان كنت بتقسى وتتنكر
وعدك على كفى المتحنى
مستنى تقرب ويشوفك
ويشهد على قلبك عينك
والوعد اللى محنى كفوفك
من فضلك
أنا نفسى أشوفك
استعجل حبة
وبلاش من حيرتك وكسوفك
د انا لمحة ف عيونك كلمة
بتوشوش قلبى الملهوف
وبتطرد من روحى الخوف
على ايه بتشوف اللى مابينا
أوهام وظنون
وأنا قلبى من حُبك عايش
دور المجنون
وتملى يطوف
حوالين الورد اللى زرعته
ف قصارى الشوق
وعيون الحب المشتاقه يجمعنا البيت
والدعوه اللى هنكتب فيها
( أحمد وشروق)
