شيماء العشرى
ازاي مشاعري معاك كده
متقسمه متعلقه؟
النص بنت بتعشقك
والباقي خايف م اللقا
ازاي بقا؟
ازاي بحس ف وقت واحد كل ده
ناحيه ف ضلوعي تكون حبيب
في التانيه تبقي من العدا
ازاي كده
رغم الوجع انا لسه بردو مكمله
مش عدل مش مستحمله
كل المشاعر جوه قلبي ملخبطه
ازاي عيوني لما ترجع م الغياب
وحده بتضحك م الفرح
والتانيه باينه معيطه ؟
جوايا حرب
جوايا ١٠٠ مليون ميدان
ازاي كمان جوايا جيش
حاول يفض الاعتصام
لكن فشل في انه يخرس صوت هتاف
ازاي يخاف؟
طب اقولك ارحل والضلوع متهدده؟
صوتي اتنبح مش باقي منه غير صدى
ازاي كده؟
شيماءالعشري ..... حليت ضفايري
=================
عوني هشام
ازاى كدا عايز حلول
وكل الامور متعقده
والعقده فيها بعمر يوم
فيه الهموم متكركبه
ومركبه فوق الرفوف
دموع .. وخوف
حتى .. الخجل
ضاع فى الكسوف
ازاى كدا
ازاى اجيلك من بعيد
وانت تسيبنى تروح بعيد
افضل مع نفسي واعيد
الذكريات
ان كات بحلم او اهات
ولسانى قال كل اللغات
والحسبه كانت معضله
القلب دق بذور حياه
طالب ..... نجاه
والصوت معايا جاب صداه
وانت معايا ومش هنا
ازاى كدا
ازاى تقول الحب
كان مولود جديد
وازاى يموت فى اللفه
وهو كان وليد
ازاى بتخلط كل جد ف الهزار
عايزنى اروح وياك لزار
رمش عينك صاب فى قلبى
ما كان بايدى مش اختيار
وابتديت مشوار معاك
لكن سدى ازاى كدا
اليوم خلاص هانفترق
قبل ما نوصل للغرق
كل الطرق اخرتها جابت مفترق
والشوق معاك اشواق بنار
رح تحترق
وانت السبب
ما هو كل شئ عندى انكتب
فى الذكريات
وكل وقت معانا فات
ارجع بقى
ارجع لمين
وماعدش وقت للقى
كل اللي بينا راح سدى
ماعرفش كيف وازاى كدا
2023/4/26
ليست هناك تعليقات:
إرسال تعليق