(١٣) الحلقة الثالثة عشر
.............................
.............................
مساء الورد مع الياسمين
يا عم يحيى وصلنا لفين
جي اليوم وحوارنا جديد
لكنُّه مهم يا نور العين
أي حوار وياك يسعدني
إختار انت وانا وياك
مواضيعك دايما تعجبني
نلف بيها كل الأفلاك
فن الشعر ده أصله رسالة
لا تسلاه ولا يوم يسلاك
كلامنا اليوم عن العزا
واللي بيحصل من حوارات
ما م الموت بناخد عظة
ولابيسيبشي فينا علامات
ديه عادات متأصله
بين عموم كل الناس
تلقى ياخال فيه هرجلة
والله ياعم مالها اساس
طب ليه مانسمع قرآن
يمكن يجينا منه بيان
كلمة تنفعنا ف دنيانا
وحكمة تنجي م النيران
قصدك يعنى ها نقعد
وبدون حديت يا خال
وليه بس بتعقد
دا سكوتنا اصله محال
ولما اشوف مسعد
يسألني ايه الاحوال
سين تجر ف جيم
والعزا ماجه ف البال
أصل العزا للمواساة
حتى بينّا يطيب الخاطر
مش للسمر والمحاكاة
نقعد مع بعض ونتسامر
بص ياعم ابو المصابيح
ياابو قول واضح وصريح
أيوه بروح وافك لساني
بس بأدبي بدون تجريح
جاي في العزا تفك لسانك
أكيد ف البيت كان مربوط
جاي بتشكي منها لجارك
امتى تكون راجل مظبوط.؟
إيه كمان ضايقك وبجد
قوللي يمكن اعرف أرد
ولو مش عاجبك ابقى فارقني
نقدك ليا زاد ع الحد
بسمع ناس وقت القران
من أفعالهم انا هـ اطق
اللي يهلل واللي يجلجل
واللي يصهلل قلبي انشق
واللي يقول عيدها من تانى
واللي يقول يا حلاوه يا سيدنا
خلق يا ناس ناويه على جناني
حطيت ايدي ف قلب الشق
دا اللي يهلل عمره ما يسمع
ولا يتدبر معنى آيات
ولا قلبه للآية بيخشع
ولا استفاد أي استفادات
ضاع خشوعه ومعاه ضيّع
حب كتاب رب السماوات
بص ياخال وبكل صراحة
ناس بتروح وبكل بجاحة
لجل ياخال تقعد تتصور
وجنب الشيخ تنصبها مناحة
طبعا جايبين فيديو يصور
لاجل المرحوم بيه يتفشخر
ينفش ريشه بين الاموات
ف الأرواح يمشي يتغندر
فعلكو والله ماهوش مقبول
تقولشي فرح والمغنى يطول
والمعازيم تحكي وتتحاكى
وتفضل ذكرى كدا علطول
وأمر تاني بشوفه غريب
يدخل واحد م البهوات
كل يقابله بشكل عجيب
يقف العزا عشان ساعات
مية وقهوة كل يوصي
ونزل ياابني للبشوات
واللي جاي يعزي صحيح
لاعنده رياء وفعله صريح
عشان راجل طيب وبسيط
يعدي عليهم زي الريح
تروح تقدم واجب عزا
تلقي العزا مليان دخان
قال يعني اصحاب واجب
وبحر الكرم اخر فيضان
قصدك يعني تعكنن كيفي
وأنا اقل في عمل الواجب
ليه دايما غرضك تكتيفي
انظر حولك بص وحاسب
عادة وارثها وعهد جدودي
ولا يمنعني عنها محارب
التدخين في الأصل حرام
هلك ف مال وهلك ف صحة
ولاعمرك تيجي لأُدّام
ولاتنامش الليل م الكحة
عارف انه ياعم حرام
وان الصحة صبحت نيله
ولا مرة هاجي لقدام
ضاع المال وخراب للعيله
لكن جوا عزانا واجب
ادخن واعزم جوَّاعزانا
لاحسن من أهالينا اتحاسب
وتفضل هادي العيبة معانا
وسط الناس نبقي معايب
خايف الهيبة أوام تنسانا
ما أحقرها من عادات
حتى ف حزن ومناسبات
نطلع منها والبال خالي
بدل ماناخد منها عظات
أصل العزا للمواساة
جبر الخاطر فيه نلقاه
يخف الام أهل الميت
اللي افعالنا مش نافعاه
الا دعاء ليه بالرحمة
وبالمغفرة من مولاه
والله صحيح قولك ومليح
ضاعت الحكمه ورحنا بلاش
سبت الذكر وقلبي جريح
أحلي سجال ياإما بلاش
بكره ياخال تاني هتقابل
عنك والله انا ما استغناش
،،،،،،،،،،،،،،،،،،،،،،،،،،،،،،،،،،
يعني جاي بكرة يا عم
طبعا جاي ياخفيف الدم
بكرة كلامنا يكون عن ايه.؟
بكرة نقول.. مستعجل ليه.؟
ليست هناك تعليقات:
إرسال تعليق