أبو جبه ........... للشاعر / يحيى ابراهيم

 
 ابو جبه الاصيل
محلاك ياابو جبه
ياعدس وادي النيل
متنقي بالحبه
ده كهرمان معتبر
لحبايببي والنخبه
يا محلا لمتنا
والاهل والصحبه
قرب ياعم الشيخ
ما تدوقي ياشابه
ورزنا لولي سالقينه بمحبه
بندق ودين النبي
ع الهادي متشرب
قرب هنا عندنا
يا صاحبي ما تجرب
وشوف جمال صنعتي
دي الحلوه مكرونه
مطبوخه بمحبتي
والله انستونا
من كل ريف من حضر
وسلامنا للي حضر
ونقول انستونا
والقوطه مدلعه
شاربه زلال م النيل
بالدقه متصنعه
قرب ودول ياجميل
وقول لي ياصميده
زود ياخال الورد
في طبقي متوزعه
وجمالها فاق الحد
الكشري ياعمنا
احكم وقول بالجد
السعد ساكن هنا
والسعد والله وعد
قرب ياواد يازعيط
وانده علي تهامي
ودوق طبق كشري
بالحمص الشامي
والدقه متزوقه
بايديا متروقه
والفلفل الحامي
تقولش ويسكي ياخال
لكنه والله حلال
واحكي لنا يإصميده
واوصف لنا الاحوال
وقول لنا اللي حصل
زود كمان البصل
يااللي جمال صنعتك
ضربوا بيها ألمثل
محسن رسم رسمته
ورسمه مصريه.
احلف ودين النبي
ع الصفحه حصريه
تنطق تقول ياجدع
تحكي جمال شعبنا
يحيي وقال كلمته
شاعر ومن وسطنا
شاعر كلامه درر
ساكن هنا بحينا
احمد كمال عطا
يديم لنا محبته
مبدع وليه تفانينيي
يحكي جمال مجدنا
كشري ياعمنا واكله مصريه
عربيه متزوقه
تقولش حوريه
قرب ياواد قرب
قرب ولا تخافشي
اوعاك تخاف م الفلس
كل عندنا وامشي
ده اللي معاه ربنا
مستور ما ينضامشي
ابو جبه الاصيل
محلاك ياابو جبه
ياعدس وادي النيل
متنقي بالحبه
الصوره للفنان محسن ابو العزم