صوره غنائيه سوق بلدنا
صباحنا نادي والفجربادي
عليك ياوطني وعلي بلادي
قرب وجرب شوف سوق بلادي
من خير بلادنا من ايد ولادنا
خضار وفاكهه طرح السنه دي
قرب ياسيدنا شوف سوق بلادنا
الفاكهه طازه اخر لذاذه
وخضارنا صابح ونقول ياهادي
ياام سماعين ربك معين
قوام هنجبر قرب ياشادي
باميه وكوسه والقوطه عندي
من خير بلدنا دوق لوستفندي
&&&&&&&&&&$$$$$$$$
عندي الحراير منديل باويه
وطرحه تخبل من صنع اخويا
تعالي ياهانم قرب يافندي
وقماش مشجر من قطن ابويا
شوف العبايه ومفرش سراير
تسعد قلوبنا تهدي السراير
عندي القطيفه مشجر وساده
عاشق بلادي عشق العباده
قمصان حريمي لجل الصبايا.
سعره مهاود لجل الولايا
كشمير وصوف دبلان تلاقي
دمور وحراير ليوم التلاقي
&&&&&&&&&&&&&&&
كوارع كوارع تشد العصب
كرشه وفشه وليها العجب
عندي العكاوي ولو كنت ناوي
توافي حبيبك ف ساعه غضب
قلب وطحال وممبار ذواتي
تأكله وتاخد منه ليلاتي
كبده وكلاوي وعندي الخصاوي
ولحمه بناتي مش م الحصاوي
ومختومه ياابني بختم الحكومه
من خير مزارعي بغيط العنب
قرب وجرب شوف خير بلدنا
انتاج بلدنا وخير للعرب
&&&&&&&&&&&&&
شفا وخمير واشرب ياعمي
طز العصير وصلي وسمي
اشرب وقولي هات عرق سوس
شراب المحبه يهدي النفوس
سوبيا جميله فشر البليله
وخروب ذواتي ينفع غموس
تمري ياهندي احلي ما عندي
اشرب ياصاحبي وخلي الفلوس
رنه صاجاتي تنادي الولاد
وكل الصبايا في كل البلاد
مين قال لي هات اشرب خميرك
اشرب وادعي حتي بضميرك
&&&&&&&&&&&&&$$
فسيخ رشيدي وسردين بلادي
ياللي هتاكل ياللي تهادي
دوق من فسيخنا وعندي الليمون
فسيخنا مملح وحسب القانون
لونه ياسونه كلون الدهب
تخليل ايديا ببراميل خشب
ورنجه وملوحه وعندي البطارخ
صنع ايديا وليها العجب
وام الخلول تشوفها تقول
تسلم ايديكم دي صنعه ابدينا
عاشق بلدنا بعشقي اهتدينا
تكالنا علي اللي بطه هادينا
دوق خير بلدنا وصنعه ايدينا
&&&&&&&((((((((((
غزل البنات واحلي حلاوه
فندام ونوجه وبطل شقاوه
دندرمه عندي بازايد غلاوه
مانجه وفراوله واخر نقاوه
فرح عيالك وشخلل جيوبك
واشكر الهك ساتر عيوبك
خد للصبيه وخد للعيال
وفرح ولادك لا تكنز بمال
سكر نبات حلوه البنات
مين قال لي هات اهدي العيال
&&&&&&&&&&&&&&&&
ياللي انت ناسي تفطر ياولدي
قرصه جميله والسمن بلدي
ست الصبايا لما تعدي
بتدوق فطيري وتقول لي هدي
كحك وسميطه وحلو الخشاف
تاكل لو حتي حاف
وفطيرة حلوه للست نجوي
كحكه بعجوه واحلي خشاف
مين قال لي هات واحده بسكر
للواد صميده ورش اكتر
اكل الصبايا وست الملاح
يحعل نهاركو نادي الصباح
دقيقنا فاخر والسمن بلدي
من خير ابويا من قبله جدي
&&&&&&((((((((
شفاشق شفاشق وكوبايات
قرب لعندي وقول لي هات
شفشق ملون لجل العصير
له يد وردي ويكون كبير
طقم الكاسات يسحر ويبهر
لجل الحبايب منقوش مشجر
ومين قال لي هات لي ياعم بعجر
واعمل حسابك واوعي المكسر
لحسن وديني وفوق دماغك
ابريق ادشش واجيب في داغك
صحصح معانا ياعم بعجر
شوف الصبايا وفتح دماغك
وهات لي دسته فنجال لقهوه
لحسن حبيبي جي النهارده
بقلم الشاعر الأديب / يحيى ابراهيم محمد
ليست هناك تعليقات:
إرسال تعليق