يا ورد ...... الشاعر حسن السحماوي

 

أنا شايف عمري بيعدي .......... الشاعر محمد صادق ندا

 

أنا شايف  عمري  بيعدي
فرحة بتجري دمعة تهدي
وأنا ياللي كنت محدش أدي
ولا عرفت دمعة طريقا لخدي
أصبح خدي مرسي ومينا
لكل دمعة تايهة حزينة حزينة
إصحي يا قلبي قوم واسمعني
ظلمني الحب لما خدعني
واتبسم وابتدي يوجعني
كوانى بنار وبشوق لوعني
فاتنى وقلبي جريح مخدوع
فاتنى وحبي غريق ف دموع
كفايا ياقلبي وأدخل جنبي
إوعاك تفتح للنار تاني
إهدي إرتاح وكفايا أماني
.......................
بقلم / محمد صادق ندا

أنا جيتلك .......... الشاعرة راوية حسن

 

أنا جيتلك وقولت كتير
كلامى وكلام كبير
يوصفلك حالى ومعاناتى
وقلبى لقلبك اسير
كان نفسى تقولى كلام
م الحلو الغالى وغرام
يفرح قلبى وعنيه
واسمعه واقول ياسلام
ولايبقى همى فى الدنيا
غير انى احبك ده كلام
وكلامى هو اللى جايبنى
ولعندك ببعتلك سلام
~~~~~~~~~~~~~
وحياتك ماترحم حالى
طول عمرك انت اللى ف بالى
كان نفسى تيجي وتقولى
ع الكلمه الحلوة اللى ف بالى
انا ياما وسهرت ليالى
ولا عمرى فكرت ف حالى
كان قلبى على طول مشغول بك
ولا قلبك حس  ولا دارى
~~~~~~~~~~~~~~~~
بصدق قلبى وعنيه
ومافيش غير حبك ليه
لو انت باقى عليه
راح اشيلك فى ننى عنيه
واقولك انت اللى فى قلبى
ولاعمرك حتهون عليه
~~~~~~~~~~~~
والدنيا وبكل ناسها
ومدينه بكل حراسها
وجناين ورد بتتفتح
وطيور بتغنى وتصدح
وسما بكل نجومها
ويطل من العالى قمرها
وسحابه بيضا معديه
وورده جميله منديه
والبحر وامواجه العاليه
الكل شافونى وسمعونى
وقالولى ياحلوة شويه
على نفسك ماانتى اللى صبيه
والكل شايفك وعارفك
وقال عنك اغنيه
فى حبك وغرامك ليه
~~~~~~~~~~~~~~~
راوية حسن

ق ص ة : صفعة مختلفة ... بقلم فضيلة معيرش

 

ق ص ة : صفعة مختلفة

وقَفتْ على شفتيه الكلمات للحظات ، تتنهد زفرات وجعه ، تبصر عيناه وميض طيفه يتداعى بين سهو ويقظة وهو يوصيه بالمحافظة على أملاكه من حقول العنب و أشجار التين و الزيتون وغيرها ، قال وهو على فراش الرحيل : أراهم جميعا كل من سبقني إليها ،أجد له وجها باسما ، تشع عيون الرضا من وجه أمي معهم…

تمضي عدة شهور على انتقال والده لدار البقاء.قطف أحد أبناء أخته عنقود عنب مما طاب ، فلمحته عين خاله الوحيد حليم ، اشتعلت نار البغض ليصفعه دون رأفة أو شفقة لحال رغبة الطفل الملحة في تناول العنب من بستان جده المتوفى وتمادى حليم في قسوته فأبلغ أخواته البنات بعدم اقترابهن وأبنائهن من أملاكه المترامية كونه الذكر الوحيد بينهن ، وكون الأعراف السائدة لا تحبذ ورث البنت حيث ترك حصتها لإخوتها ، كتمن ما حل بهن من حرمانهن من أملاك ، حتى بلغ مسامعهن بيعه لبعض أملاك والده دون استشارتهن ، شلت الدهشة أطرافه وهو يستلم مطلبهن بتقسيم التركة من المحكمة، كان إصرارهن أكبر من توسلاته ، أخذنا حصصهن ، وكفّ الندم تصفع قلبه الذي تعود المكابرة والتجبر .

ف/ م

 

الهِجـرَة ..... الشاعر عاطف صلاح

 

الهِجـرَة .....   بقلمى..عاطف صلاح
-----------------------------------
هَهَاجِرْ ياامّا ومش راجع
م تِنّسينيش وابقى ادعيلى
دعاكى دايمًا لينا دافع
يِقَوّى فى عَزيمتى و حِيلى
ولا تزعَليش ياامّا د هَمّي
باعَدّني عن وطنى ودَمّي
مش بس انا ف غربه ياأمى
د كتير زَيّي ومن جيلى
*******
يا إبنى أمك محتاجه
تكون جنبها وقت الحاجه
يانن عينى نسيت حاجه
ح قولها ليك لما تجينى
الغربه تربه ياضنايا
بتدفن اللى يعَدى لها
خليك ياولدى هنا معايا
ربك كريم هيعَدّلها
د الدنيا لو مالت زالت
عُمّرَك م تقدر تِعّدِلها
***********
أرجوكى يامّاسبينى أشوف
بلاد جديده بقناديلها
وسيبى الخوف اعملى معروف
د انا بَلَدى فى عِنَيّا شايلها
*************
أنا عارفه ياابنى يانور عينى
ياللى بعادك على عينى
مهما البعاد هَيطوول وَيّاك
هتلف تلف وهَتّجيني٠
عاطف صلاح

رباعيات .... الشاعر شعبان محمد بدر Shaban Mohamed Badr

 

 
 
الكل ليك بايعين
 والسعر مش فارق
حتي الصحاب ماشيين
والكل ليك فارق
...
جرحك صِعِب علي مين
جرحك دا  كان حارق
تهرب تروح على فين
تهرب كما السارق
..
شايل هموم لسنين
والحمل فيك فارق
تشكي الجراح دي لمين
إشكيها للخالق

الشاعر شعبان محمد بدر
Shaban Mohamed Badr

أغلى ما ليا ......... الشاعر فهمي علي نصر

 

و على ضهر الغلاف مكتوب
بأنك اغلا ما ليا
يا ليل طيب و متوضي
و حرفك نني ف عنيا
انا اصلا ماليش غيرك
و قلبي ف الغرام طيرك
يجوز باهرب من الدنيا
و اغيب لكن انا أسيرك
باروح ف الحلم و بقابلك
و ناسي اي شئ قبلك
ما انا اللي من سفر ابلك
و ضحكة روحي من خيرك
طب اقري القصة بهوادة
و شوفي بصدق كالعادة
ما انا عاشقك و بزيادة
و مش محتار ف تفسيرك
باحبك... رغم عن مسافات
و عمر قضيته خوف و سكات
دا بعدك قلبي ناسي ما فات
عشان سري بقى ف بيرك

احفظ سرك .............. الشاعر حمدينو الشهاوي Hamdino Alshahawy

 

((  احفظ سرك  ))
 
******************************
أنا جاي   احكي     لكم     على     جراحي
******************************
حكيت   وندمت  مليون  مرة  اني حكيت
حكيت  وانا   فاكر  اني  حكايتي  هتفضل
سر                      جوا                  البيت
لكني عرفت متأخر بأن السر معناه أضحك
في  وش  الناس وقلبي مكسَّرينه فتافيت
******************************
انا  المدبوح  وبتألم  وانا نايم  وانا صاحي
******************************
حكيت   وانا    فاكر   ان  السر  بين  اتنين
لكنِّي   فهمت   متأخر   بأن   السر    مكانه
في   القلب   وما  يبانش  كمان  في العين
ولا يصون   السر  غير   ربك  ولا     تحكي
مع  نفسك  ولا يسمع  كلامك  ولا  الملكين
والا  هتبقى  زي كتير دبوحهم اللي فاكرين
نفسهم    حجاج   وفاكرين     اننا     هَديّ
******************************
في    عيد      الأضحى     وأضاحي
******************************
حكيت   ورجعت    لصوابع بالندم عضيت
وبندم في كل ثانية من عمري بأني حكيت
لكن  ولا ينفع   ولا يشفع   كلامي    ياريت
واللي   يخون   سري  وانا  فاكره اقرب ليا
من   نفسي  وخلاني    كرهت          البيت
******************************
بقيت ارتاح وانا بره ووالله كرهت مرواحي
******************************  
انا هحكي باقي حكايتي عشان الناس تتعلم
اوعاك   يبان   لعدوك  انك بتتعذب   وتتألم
وخلي  بير   أسرارك   كده  مقفول  ومضلم
ومايغركش ضحك الناس وهي جاية بتسلم
اهو     انا     جيت     وبرضو          حكيت
وما       تظنوش      كلامي          حواديت
******************************
كلامي مكتوب  بدم  ولسه  بتنزفه جراحي
******************************
 
(( حمدينو الشهاوي ))
Hamdino Alshahawy
 

مش وقت جدال ........ الشاعر رضا ابو الغيط

 

مش وقت جدال
من ديوان كلام عواجيز
***********
أمي الغاليه غلاوة الروح
من إمتى كان بينا خلاف
على مين يتشال أو مين يتشاف
 بعيون القلب
من امتى كان بينا خلاف
على مين يتغطى برمش العين
أو مين يتغطى بطرف الشال
ف ليالى البرد
من امتى المال اللى ف جيبى
مش ملك ايديكى الاتنين
من امتى الحب اللى ف قلبك
ما يكفى يا غاليه الملايين
من امتى العين حاولت مَره
 تتمرد ع العيشه المُره
لو حتى يومين
طول عمرى عايش خدامك
وتراب بيمهد لمداسك
يتمخطر زين
طول عمرى انا بسهر ما بنام
غير لما تنامى ف أحضانى
وأغطى حياتك  برموشى
وادعي لك  ربى  يخليكى
وتقولى أمين
طول عمرك كنت بتدعى لى
بصلاح الحال
وتصُرى الأكل ف منديلى
وقت الترحال
وتخبى دموعك ف ضلوعك
علشان اطمن وأسافر
وأجمع ف المال
إيه اللى اتغير يا أصيله
خلاكى بتشكى من العيله
ودموعك تٍملا  الحوَّال
من امتى بتقسى على ولادك
وبتدعى عليهم  يتحرموا
من راحة البال
دول ياامه عيال
مش فاهمه معنى الحريه
ولا شايفه شكل الأهوال
كل اللى هاممهم يتغدوا
ويدوقوا الشهد  المتخزن
ف الصُفه عند النحال
دول ياامَّه عيال
مش فاهمه معنى التجريف
وكلامهم وهم وتخريف
كل اللى هاممهم يتخانقوا
على نص رغيف
ونجاوب عن كل سؤال
دول لسه يادوب
بيحدفوا طوب
شغل الجُهال
فاكرين علشان طولم حبَّه
وشنابهم وصلت للجبهه
يتعدوا رجال
دول لسة عيال
أطفال
مش فاهمه االفكر اللى ف راسك
 ولا عارفه أن المدارى
مش شرط يصارح كُراسك
ويصرح بيه الإرسال
مش فاهمه الصمت اللى مخبى
على نن عيونهم أسرار
ما تطيقه جبال
وان جالها الوقت هتتقال
ويحسوا إنك أم حقيقي
وف عقلك ضربوا الأمثال
دول لسه عيال
فاكرنها كلام
مش عارفه أن البشريه
مليانه لئام
بتحارب كل الأحلام
وهواها تفرق لمتنا
ونعيش كنعام
أو حتى عبيد
نمشيها شمال
دول ياامه عيال
لميهم تانى ف أحضانك
وف حضن الدار
ف بيوت الحُب اللى أوتهم
ليل ويا نهار
دول لسه صغار
ومسير الدنيا تفهمهم
مين هى الأم اللى عشانهم
اتحدت كل الأندال
مين هى الأم اللى استلفت
من طوب الارض وحضنتهم
علشان ما تعلى البنيان
وتغطى رموشها العريان
وتحسن وضع الأحوال
أمي الغاليه غلاوة الروح
وعبيرك دابما بيفوح
من امتى كان بينا خلاف
أو حتى جفاف
هيشمت فينا العزال
طول عمرك بتحبي  الكل
وتصلحى  وردك والفل
يا أصيله
مش وقت جدال
************
رضا أبو الغيط

حبيبي ...........الشاعر يسري عثمان