بياعة الشاي
للشاعر سمير محمد محمود
ايه يعني تموت؟
ماهي ماتت وقت ماكانت
عايزة تعيش
فماتقنعنيش
ان البت البالغة خمستاشر
والواد الداخل ف حداشر
دهسوها ف لحظة طيش
طب اراهنك انها كان
نفسها في الموت؟
واسألوا ذلها علشان
ما تجيب لولادها القوت
واسألوا اندال وكلاب
حطولها شروط
نتفولها الريش
واسألوا كام عين كانت
بتعري في مفاتنها
واسألوا كام داين
رفضوا سكوتهم على دينها
وإسألوا معدتها
عن طعم الشاي من غير قراميش
وعايزها تعيش؟
ما هو كل يومين
بياعة شاي يدهسها
جموح بنت الباشا
وابن الباشا
وبكل سهولة يموت الجُرْم
ويتلاشى
فيسود الليل
وشموس الحق تغيب
ماتجيش
فازاي هتعيش؟
بياعة الشاي
من يوم مولدها بتتداس
من فقر لذل لحد
دخولها الاحداث
من ساعة لما ايديها اتمدت
ومباني الحلم قصادها اتهدت
ورصيدها ف بنك الدنيا مافيش
يمكن دلوقتي بموتها تعيش
فماتقنعنيش
ليست هناك تعليقات:
إرسال تعليق