مَسَّخِت هِىَّ الحِكايَة
واحنَا ناس مُش دَاريانِين
كُل يُوم تِلقىٰ الصَّبايَا
فِ الرَّذايِل غَارقانِين
الِّلي شَايفَه حَبيبها فارِس
وَاد لَذِيذ وبجَد مُوز
والِّلي شَايْفَاه وَاد خُلاصَة
ما بْيَاكُلش خضار ورُز
وَاد مِقَفِّل نُص لِبْدَه
وف إيِدِيه كُربَاج ومَطوَة
عَلِّمُوه شُرب السَّجايِر
لِلحَشِيش علیٰ مُخُّه سَطوَة
والشَّباب بَنانِيت وخايْبَة
بَس شَاطرِين فِ التَّفاهَة
دِيمَا دايْرِين فِ الشَّوَارِع
مُدمِنِين طَعم البَلاهَة
جُوَّا مِنهُم ضَلْمَة حَالكَة
إنَّما أساطِير كَلام
يِفْحِمُوك كَما نِمْرَة واحِد
أيْوَه عَايْشِين والسَّلام
الإيمَان مَمْنُوع عَلِيهُم
والصلاة تُقْل الجِبال
وَقْتُهُم ما بَقاش شَاغِلهُم
أصلهُم نِسيُوه فَزال
لوْ قابِلت ف مَرَّة أُمُّه
هَتْلاقِيها نَاسيَة رُوحهَا
أصل بِسَلامْتُه المِفتَّح
كُل يُوم بِيزِيد جُروحهَا
هُوَّ عايِز ... أيْوَا عايِز
قُول لُه طَيِّب جِيبْت إيِه
هَتْلاقِيه بِيْعَلِّي صُوتُه
والشَّرار جَاي مِن عِنيه
كُنْتُوا لِيه بِتْخَلِّفُونا
وانتُو مُش قَد الرِّبايَة
إضْرَبُوا الأَرض وهَاتُوا لنَا
هِىَّ دِي بجَد الرِّوَايَة
أبَّهات لِيَّام دِي شَاربَة
المَرار والعُمر جَارِي
شَغَّالِين مِيت ألْف شُغْلَة
تَعبانِين ولا حَد دَاري
العَجيبَة والغَريبَة
إنْ دَا بَقیٰ عُرف سَايِد
جِيل مَالُوش فِ الصَّح لَمْسَة
جَايْبَة جِيل كان عَزْمُه زايِد
