ما تكتبنيش كتاب في يومين
وتنساني بقيت عمرك
أنا مش بيت من شطرين
أنا الكلمه اللي بتضمك
كلامك آه مفرحني ودَمَع عين
لكن صمتك وجع قلبي اللي بيضمك
وفين الفرح لما تكون
في ساعه كتبت دواوينك
وعشت الباقي كله حزين
وكل الناس تقول فينك
ويتسألوا
هل الإحساس خلاص راحل؟
حبيبة قلبه فين هيا
ماكنت ليك نيكوتينك
وبجري جوا شرايينك
وقلت عليا نهر الحب
وشايل طميّ في عينك
وزارع جوا روحك شهد
ومحتاجني دفا سنينك
ورغم شقاك وتعبك عمر
أنا راحتك وتكوينك
وراح فين الأمل والشوق
وليه السرد صامت جوا جوا الجوف
وجسم نحيل براه الخوف
وباقي سكه محفوفه بعمى
مش شوف
ولو أسأل على سرك
تقولي ظروف
هعاتبك ليه وأنا حاسه
وشايفه جوا أعتابك بتتخفى
وخوف قلبي على المكشوف
يدوبك فرحة البدايات
لحاف الهجر ليه غطاك
وخدت بواقي من روحي
ومات الشوق دفنته هناك
وأوزوريسك بتحفر طين
عشان تجمع بواقي هواك
وهايمه وسط خلق الله
بتسأل في البلاد سواح
ع طيفك
وتتمنى على قلبك تكون
ضيفك
لكن هيهات !!!
خسارة فرحة البدايااات
