وقف العمر
وقف العمر هزيل ف عيونه كام بصة
قال للزمن بشويش من فضلك اتوصى
عُقد السنين انفرط ومعادش فيه باقي
معادش ليا تمن ولا سعر في البورصة
.........
بص الزمن للعمر ورفع له في الحاجب
قال له ياسيد الناس انزل وانا الراكب
مهما تطول ياعمر ليك أخرة ونهاية
فبلاش تلوم ع الكسر أصل القزاز دايب
........
أصغر وشوش كرمشت من كتر أوجاعها
هي السنين لو مشت طب ايه يرجعها؟!
الدنيا دي مدرسة فيها الحضور غايب
تموت في كسر البوز للي يشجعها!
........
انا كنت طفل زمان ف المرحلة الاولى
بفرح وبرضو بخاف من امنا الغولة
مر الزمان وكبرت والشعر مني شاب
الحلم مني مات وفهمت انا الفولة!
.......
عايشين مابين ضدين الشر والطيبة
مين اللي يكسب مين ويحقق الهيبة؟!
للشر دايما صوت وجنوده من بينا
والخير ملوش جمهور ولا حتى لعيبة!
........
عاشرنا ناس واطيين للعشرة بيخونوا
القلب كله مرار والشكل كان نونو!
شربنا من كدبهم واكلنا100 مرة
لا صانوا يوم ملحنا من امتى بيصونوا؟!
