أخضر يا حراتي
وف قلب قرونك
ذكرى جميلة بتحكي حياتي
وليالي زمان
وحكاوي زمان
بين امي الغالية وبيني
وكل اخواتي
واللمة الحلوة ف قلب البيت
نسهر ونغني واحيانا نحكي الحواديت
والضحكة تلعلع وتهلل
والفرحة تلالي
والصورة بترسم كام صورة
حلوين ف خيالي
والجو نضيف بيضم العيلة
ف دم خفيف
والفول ف ايدينا وبالجبنة
مع ربع رغيف
حاسين بسعادة ماتتقدر
يا سلام على طعم الفول الاخضر
وحلاوة بيتنا المتزوق بشواشي القش
والحطب الناشف علي طرفه
عصافير ف العش
وصوامع القمح المتخزن
بحبوب القمح اللي بتحميه
مرصوص حواليها علي سطوحنا كام زلعة مش
والفجر يشقق وتزقزق وياه العصافير
تنزل للارض باشواقها وف لحظة تطير
وترمبة مية قصاد البيت نكنس ونرشرش ف الشارع والحب كبير
نملى الزلعات
نغسل مواعين
مع بعض نساعد ونساند ونشيل ونعين
وشارعنا ف ساعة العصرية
ملعب للكل
واولاد الشارع تتجمع ياسمين مع فل
ناس تلعب كورة وناس تانية قاعدين ف الضل
علي ناصية بيتنا كانت لمة
فيها دم وروح
ولاعمر الحب قعد فيها ويقوم مجروح
كان قلب الكل زمان ع الكل
انا زي ما كون
شيئ خدني هناك
رجعني لصوت العصفورة تحت الشباك
ولغنوة امي اما تغنيلي
اكلك من فين
والضحكة الفايقة ع الخدين
وجدايل شعري المتلون من لون الشمس
انا سبت اليوم وحكاوي اليوم اللي تحزن
وباعيش ف الامس
_____________________
من ديوان زي الشمس 🌴🌴🌴
سميرة محمودي
