ضريبة الحب ... للشاعر / السعيد اللفاف

ضريبة الحب

..............

مش كلمه بتتقال وخلاص

المسأله اكبر بكتير

دى ثمرة جهد واخلاص

وما هياش موضوع تعبير

محتاجه لواحد غواص

فارس ومغامر وخطير

متمتع بصفات وخواص

مش موجوده فى حد كتير

اصل الحب ياناس احساس

والصدفه لها حظ وفير

من اول لحظه لمّاس

وما بيفيديشى معاه محاذير

وانت بعيد عودك مياس

وبتتعاجب زى الطير

وان الفاس وقعت ف الراس

اتحمل دفع الفواتير

..........................

للشاعر / السعيد اللفاف

مراسيل . للشاعرة / راوية حسن

مراسيل
~~~~~
ياما بعت لك مراسيل
انك ترد او حتى تجينى
بس انت ياحبيبى تميل
وبعدك اصله كان عينى
ليه الغياب من غير عتاب
ماتقلى ايه هى الاسباب
حرد عليك واقول لعنيك
ليه تبعد عنى وفين الاقيك
ليه انت بس حبيبى عنيد
والبعد عنى بايه حيفيد
يا إما تيجى وتقلى سماح
وقلبى ساعتها يعيش مرتاح
واتهنى بيك واعيش جواليك
ولايكون لى فيك شريك
اصل انت ليا وغالى عليا
وفداك كمان روحى وعنيه
واللى فات من عمرى فات
واللى جاى ياحبيبى ليك
ياما حلمت ليلاتى بيك
وحياتى تكمل وانا شاريك
وجودك بيخلى لحياتى معنى
وانا دايما بيها افرح واتهنى
بس انت حبيبى تعالى وقول
وانا كمان بالى بيك مشغول

للشاعرة / راوية حسن

١ تعليق

كرباج ورا . للشاعر / يسرى عثمان

بتطل بموجه وشمسيه
وبتبدر عا الناس حنيه
وغنا ومواويل والجو عليل
كرباج ورا ياسطى الصبحيه
--
البسمه حلوه صباحه
الروح اهى راضيه مرتاحه
بصراحه مع كل صراحه
قلبك يبرق معاه قناديل
كرباج ورا ياسطى الصبحيه
--
يا وداد وفنون 
والحرف جنون
قلبى المسجون
يتمنى يطبطب على طيفك
والبحر غريق
وانا قلبى برىء
رب المخاليق
يسمع لدعايا واشوفك
واسمى واصلى
متين مره
الروح حاترفرف 
كدا حره
وحاعبى لك قلبى ف صره
مسجونه وطلعت من جره
كرباج ورا ياسطى كمان مره
-------
وعوازلك دايما حاسدينك
م الرقه الطاله على جبينك
والناى بيضحك ف الشفه
عشان احنا دايما عايزينك
كرباج ورا ياسطى الصبحيه
----
لو غبت الورد حايتكدر
دى غلاوتك مكتوب ومقدر
والا انت عشان عرف انك
ف عيونا وقلبنا تتكبر
كرباج ورا ياسطى كمان اكتر
----
ياغزال ممشوق
يا نهار وشروق
ياواد انت ياذوق
خف علينا
قلبنا محروق
من تقل وشوق
اسم الله عليك
اسم الله عليك
طل نادينا
كرباج ورا ياسطى عليه سكر‏'
...............................
 للشاعر /  يسري عثمان 
‏‎Yousry Osman‎‏ ‏‏  

فن البوستات .. للشار / جابر سليمان

فن البوستات
..............
يا محلا لمة أحبابنا 
أخوه وأخوات
والحب عشش ف قلوبنا
وسلم سلامات
تسلم ايدين اللي جمعنا
بنادي البوستات
استاذ كمال يمتعنا
فن وحكايات
والكل شاهد وسامعنا
ف كل الأوقات
............................
للشاعر / جابر سليمان

نور الصبح ..... للشاعرة / أميره القزاز

لما نور الصبح يشق 
الليل 
لما قلب الحب يطرح
مواويل 
لما الدنيا كلها تضحك 
علي نغمه تميل 
لما يتوه القلب مش 
لاقي دليل 
يبقي القلب اتلخبط
حاله 
سكتت عيونه وضحكوا
ومالو  
ولا ليل ولا صبح بقوا 
فارقين 
..........................
للشاعرة / أميره القزاز
Amira Mahmoud

لحظة حداد........ للشاعرة / هاله عربي

لحظة حداد 
كان قلب نونو 
 وعيونه لسه صغيرين  
الفرحه كانت ضحكته 
والدنيا حلوه ف ضمته  
ف لحظه كان فيها القدر
واقف وفاتح الإيدين 
علشان شويه مُهملين 
راح نشكى مين ونقول لمين
دول ناس قلوبهم الضمير جواها مات
ساندى يا احلى البنات
يا ضحكة العمر اللى فات
ساندى راحت وراح معاها
طفل كان يشبه طينتها 
كان معاها ابن خالتها 
ايده كانت ماسكه ايدها 
جانا الوجع من غير ميعاد
ومعاه فساد ف بلادنا زاد
راح عبدو , وراحت ضحكته
راح الولد .. ومعاه عيونه وبسمته  
من فضلكم  يا مؤمنين 
لحظه حداد .. ياحاضرين ؟
............................ 
للشاعرة / هاله عربي

بعتلك كلام . للشاعرة / امل الطهطاوى

بعتلك كلام كتير 
والورد كان لك أسير
ليه بتنسى ذكرى كانت
ليه بتنسى قلبي الكبير
............................... 
للشاعرة / امل الطهطاوى

راجع لقوقعتى . للشاعر / ابراهيم رضوان

راجع لقوقعتي    
لكنني مش نادم
أغسل شلل ساعتي     
من قسوة العادم
و لا حد فاهمني    
غير قطتي الطاهره
لو شوك بيألمني    
تصبح شعاع زهره
لله .. تسلمني     
و لا جاه و لا شهره
آه يا اعتدال .. جوعتي   
علشان شبع .. قادم
............................... 
للشاعر / ابراهيم رضوان

ساعة الوداع .... للشاعر / مجدي فرحات

ساعة الوداع
وأنا جايه أودعك
حس قلبي بأوجاع
كنت عايزه أكلمك
لقيت الكلام ضاع
لما شوفت نظرتك
مليانه كره وخداع
ما هي دي قدرتك
لو قلبك ليا سماع
وعلى وشك بسمتك
لا كان بينا يوم وداع
ولا روحي آه فارقتك
من بعد الحب ما ضاع
قولي فيها ايه آه دنيتك
.............................. 
للشاعر / مجدي فرحات

عيون الحب . للشاعر / حسن السحماوي

عيون الحب سهرانه على بابك    
ومن يومها .. أنا وقلبى من احبابك     
أغير من النجم لو يلمح ضيا عيونك     
وأحب النسمة لو عدت على خدودك     
واصاحب فى السما قمرك .. واعيش سهرك      
ولو طل النهار ألمح .. فى صبحك صورتى فى عيونك  
.......................... 
 فارس الكلمة والمعنى
حسن السحماوي